Tuladha ing ngisor iki nalikani kajibah dherekake serah-serahan (Pasok Srana)
Assalamu’alaikum Wr. Wb.
Panjenenganipun
para pepundhen, para sesepuh, para pinisipuh ingkang hanggung mastuti dhumateng
pepoyaning kautaman ingkang pantes pinundhi, para duta saraya saking kadang besan sutresna ingkang pantes kinurmatan,
para lenggah kakung sumohowono putri, kadang wredha mudha tumaruna ingkang
winantu suko basuki.
Mradapa keparingipun Ibu Sajiyah sumrambah para kulawangsa
ing kalenggahan punika, kulo piniji pinangka pambiawara wontening upacara
pasrah panampining upakarti miwah lamaran pinangka jejangkeping tata cara
salakirabbi.
Namung
saderengipun kawulo ngaturaken urut reroncening adi cara ingkang sampun karakit
dening para kulawarga, cundhuk kalian
kuncaraning bangsa ingkang linambaran Pancasila saha hangemban Eka Prasetya
Panca Karsa, sumonggo nun kawula dhereaken ngaturaken puji syukur wonten ngarsa
dalem Allah SWT ingkang maha agung, karana ageng barokah saha rahmat ingkang
sampun kaparingaken dhumateng sadaya dalasan kawula, amiin.
Sinawung
raos syukur ing ngajeng, mugi lampahing adi cara pasrah panampi lamaran saha
upakarti pinangka jejangkeping pala krama tansah pinaringan rahayu tebih ing
sambekala.
Nun
inggih para lenggah ingkang sinuba sagung ing pakurmatan, keparenga pranata
cara murwani lekasing sedya ingkang punika enggal badhe binuka lampahing
adicara pasrah panampi kanthi ngaturaken reroncening adicara ingkang rinantam
para kulawangsa.
- Pambuka,
- Atur waosan Pustaka Suci Wahyuning Illahi rabbi dening Adhimas : ……………
- Kasambet ingkang angka tiga Atur Pambagya Harjo sugeng rawuh ingkang badhe dipun salirani Panjenenganipun Bapak Sapar Sayudi. (Kasuwun Ibu Sajiyah ngampingi)
- Rantaman saklajengipun Atur Pasrah Calon Pengantin Kakung ingkang badhe dipun salirani Panjenenganipun Bapak ………………
- Dipun lajengaken atur panampining pasrah saking Calon Pengantin Kakung badhe dipun tampi panjenenganipun Bapak Teguh Edi Susanto, B.Sc.
- Saksampunipun paripurna atur panampining gati kalajengaken Do’a ingkang badhe dipun aturaken Bapak …………
- Sumene
- Ramah tamah
- 9. Panutup.
Mekaten
para rawuh saha para lenggah urut reroncening tata adicara pasrah srana dalah
lamaran ingkang sinanggit dening
kulawarga, kasuwun wontene suka lilaning penggalih para lenggah tansah hanjenengi ngantos dumugining purnaning gati.
Sanggyaning
para lenggah kakung sumowana putri, ingkang sinuba ing pakurmatan, raos bombong
miwah mongkoking manah, panjenenganipun Ibu Sajiyah ingkang hamengku gati
mboten saget hagambaraken ing mriki, madyaning pahargyan ing kalenggahan punika
ing sedya badhe hangaturaken pambagya harja wonten ngarsa panjenengan, awit
saking bomboming manah anggennya badhe matur among kandheg wonten samadyaning
jangga, ingkang punika minangka sulih sarira ingkang piniji nun inggih
panjenenganipun Bapak Sapar Sayudi wekdal kasumanggakaken, sumangga nun. Terwaca cetha kaduk ruruh hangarah prana
aturipun Bapak Sapar Sayudi pinangka sulih sarira ingkang hamengku gati.
Para
lenggah kakung putri ingkang satuhu kinurmatan, selajengipun dumugi laksitaning
tata adi cara atur pasrahing saking duta saraya badhe/calon kadang besan.
Wondene ingkang pinangka sulih sarira nun inggih panjenenganipun Bapak ……………………………….
wekdal soho papan kawulo sumanggaaken. Kanthi
teges, tetes, soho mentes atur panampi saking panjenenganipun Bapak Teguh
Edi Santoso, B.Sc. minangka sulih saliranipun ingkang hamengku gati, ingkang
saklajengipun dipun wonteni paniti priksa sarana ingkang kapasrahaken saha
kaleksanaaken parago saking duta saraya dhumateng panampi pasrah, ujuding arta
miwah jene salajengipun kaaturaken dhumateng ingkang hamengku gati,
kaleksananing sedya kasumanggaaken. Para lenggah kakung sumowono putri ingkang
pantes sinuba sinudarsana, laksitaning
tata adi cara ingkang sampun rinakit dening kulawarga kados sampun
kaleksanan kanthi pinayungan karaharjan tebih ing sambikala. Namung
panyuwunipun Ibu Sajiyah, panjenenganipun para lenggah kakung putri kasuwun
lelenggahan kanthi mirunggan dumugi paripurnaning gati. Kawula aturakin ing
mriki mbok bilih pratandha pari purnaning gati ing kalenggahan punika menawi
calon penganten kekalih miwah Ibu Sajiyah sampun kawistara jumeneng wonten
sangajenging wiwara, ingkang punika kasuwun tansah nyebar godhong kawis, sabar ingkang sawetawis, nuwun, matur nuwun. Hadungkap titi mangsa kala pari purnaning
sedya, karana reroncening tata adicara sampun kaleksanan dening kulawarga.
Para tamu kakung putri ingkang satuhu bagya mulya, saderengipun purnaning gati
panjenenganipun Ibu Sajiyah pinangka ingkang hamengku gati ngunjukaken raos
syukur wonten ngarsaning Illahi Rabbi Gusti ingkang Maha Agung kanthi
kaleksananing sedya pinaringan wilujeng nir ing sambikala, mboten kekilapan
ngaturaken panuwun dhumateng para duta saraya sumrambah para tamu samudayanipun,
ingkang punika Ibu Sajiyah tansah hanglenggana budi dayaning manungsa kirang
sampurna, hambok bilih anggenipun nampi karawuhanipun wonten kirang tangguh, gupuh miwah suguh saha
anggenipun hangaturi palenggahan panjenengan sadaya kirang hanuju prana kalihan
andhap inggiling kalenggahan
panjenengan sedaya, kagerba kiranging
boja miwah krama, mugya diagung pangaksama. Kawula minangka pambiawara ugi hanglenggana karana kirangeng seserepan
hanjalari kthuking pamanggih miwah kirang pana dhumateng wewarah wewangsoning
para winasis ing reh basa tuwin sastra, ingkang punika hambok bilih wonten
kalepatan kula, mugi para tamu samudaya ngluberaken pangaksama ingkang agung.
Kasuwun
calon risang pinanganten lumarap wonten sangajenging kori wiwaraning wisma
hanjenengi para tamu sowang-sowang badhe kondur. Hamung semanten pahargyan
lamaran ingkang kaleksanan para kulawarga, sesantining
Ibu Sajiyah mugi tansah rahayu, rahayu
ingkang sarwi tinemu, kunduripun dherekaken sugeng.
Wassalamu’alaikum Warahmatullahi Wabarakaatuh.